Minister Gouvernman Lokal e Zafer Kominoter i rekonnet Brigad Dirzans dan distrik

Pour premye fwa dan listwar District Emergency Brigade, sa gran group brigad in ganny onore pour zot zefor e devouman koman bann volonter.

Sa ti dan en seremoni organize par Minister Gouvernman Lokal e Zafer Kominoter Mardi le 5 Desanm, 2023 kot lotel Berjaya Beau Vallon Bay, pour komemor Lazournen Eternasyonal pour bann Volonter ki ganny obzerve menm zour.

Bann manm brigad ki aktiv dan tou distrik, enkli Praslin e La Digue, ti prezan pour kolekte zot sertifika.

Dan son ladres pour sa lokazyon, Minis responsab pour Gouvernman Lokal e Zafer Kominoter ti remersye sa bann volonter pour zot devouman e kontribisyon inestimab.

Brigad dirzans dan distrik i konpri bann zonm ek fanm determinen e kapab ki donn Ladministrasyon Distrik zot soutyen pandan bann diferan kalamite.Swa ki i en deboulir later, en inondasyon, en pye dibwa tonbe, dife brousay ouswa dife lakaz, e plis ankor, manm brigad i touzour prezan pour donn en koudmen kantmenm lapli, soley, granmaten ouswa tar aswar.

Minister Gouvernman Lokal e Zafer Kominoter i kont li 260 manm brigad ki aktiv dan distrik.

“Sa lannen, Lazournen Enternasyonal dedye pour bann Volonter pe ganny obzerve avek tenm ‘‘The power of collective action: if everyone did’ - en tenm ki reflekte lo sa ki nou kapab realize si nou travay ansanm. Se sa vre lespri Brigad dan distrik,” Minis Hoareau ti dir dan son ladres.

“I evidan ki volontarya i zwe en rol enportan pour realiz Plan Stratezik Minister Gouvernman Lokal e Zafer Kominoter pour 2022-2026, ki vize ver devlopman kominoter ki soutenab e enklizif.”

Minis Hoareau ti osi lans en lapel pour ki plis endividi i zwenn brigad dan zot distrik respektiv e ed zot kominote.

Lo son par, Sekreter Prensipal pour Gouvernman Lokal e Zafer Kominoter, Msye Kevin Perine, ti fer resorti ki manm brigad pour benefisye avek plis training an 2024 ensi byen ki avek plis reours e lekipman.

Sa levennman ti osi vwar temwanyaz de manm brigad, Madanm Priscilla Bristol e Msye Bryan Marie.

Brigad Dirzans dan distrik ti ganny etablir avek bi promouvwar lespri volontarya e ankouraz partisipasyon aktiv dan lakominote. Tou le 27 Ladministrasyon Distrik i annan son tim brigad ki sipoze pare pour fourni lasistans dan zot distrik ouswa rezyon respektiv.

Zot osi fourni lasitans lo nivo nasyonal tel koman pandan Tsunami ki ti enpakte Sesel an Desanm 2004 e sa gro lapli ki ti swiv apre an Zanvye 2005, ensi byen ki pandan linondasyon koze par siklonn ‘Feleng’ an 2013 ki ti enpakte sirtou lakot les Mahe.